គួរឲ្យគោរពនូវទឹកចិត្ត សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានជួយឧបត្ថម្ភដល់លោក យូ​ ឌីស្កូ

ក្រោយពីលេចលឺដំនឹងថា តារាសម្ដែង​ និងពិធីករ លោក យូ ឌីស្កូ កំពុងសម្រាកពេទ្យ និងស្ថិតក្នុងអាការៈធ្ងន់ធ្ងរទៀតផង។ ជាមួយគ្នានេះ ប្រធានសមាគមសិល្បៈ អ្នកនាង ចន ច័ន្ទលក្ខិណា និងសិល្បៈករខ្មែរជាច្រើនបាននាំគ្នាស្វះស្វែង ខំប្រឹងជួយលោក យូ ឌីស្កូអស់ពីកំលាំងកាយចិត្ត។ ជាមួយនឹងគ្នានេះ នាព្រឹកថ្ងៃទី ៦​ ខែតុលា​ ឆ្នាំ២០១៧ កន្លងទៅនេះ កាកបាទក្រហមកម្ពុជា ដែលមាន​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានឧបត្ថម្ភគ្រឿងឧបភោគ-បរិភោគ សម្ភារៈប្រើប្រាស់ និងថវិកាមួយចំនួន ជូន លោក​ យូ​ ឌីស្កូ ផងដែរ។

ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើនូវការសួរសុខទុក្ខចំពោះលោក យូ​ ឌីស្កូ​ និងផ្តាំផ្ញើ​ឱ្យខិតខំបរិភោគ​អាហារ បំប៉នសុខភាព​ឱ្យបានល្អ និងអនុវត្តតាមការណែនាំរបស់គ្រូពេទ្យ​ ព្រមទាំងជូនពរឆាប់បានជាសះស្បើយឡើងវិញ។ ជាហេតុធ្វើឲ្យអ្នកម្ដាយរបស់លោកយូ ឌីស្កូ បានសំដែងក្តីរំភើបជាខ្លាំង​នឹងទឹកចិត្តសប្បុរសនេះ។ គួរបញ្ជាក់ផងដែរថា ខណៈនេះលោក យូ ឌីស្កូ កំពុងសម្រាកព្យាបាលនៅមន្ទីរពេទ្យព្រះកេតុមាលា ក្នុងសភាពធ្ងន់ធ្ងរ និងកំពុងប្រកាសស្វែងរកអ្នកដែលអាចបរិច្ចាគឈាម ដោយគាត់កំពុងលាងឈាម មានបញ្ហាក្រលៀន ទឹកនោមប្រៃ និងឈាមសឡើងខ្ពស់ និងត្រូវការឈាមប្រភេទ AB + ជាបន្ទាន់ផងដែរ៕